Tapað / Fundið.............

Búin að vera frekar tætt í dag, vaknaði með andfælum þegar Alexander minn birtist á tröppunni um áttaleytið í morgun.  Eitthvað fannst honum amma leiðinleg því hann bað fljótlega um að fá að hringja í bróður sinn og fá hann í heimsókn.  Það var auðsótt,  þeir léku sér síðan meðan amman hypjaði sig í fötin og lauk við að pakka inn jólapósti sem þurfti að koma á póst.  Síðan kíktum við í sveitina til frænku, svo þurfti að versla í hádegismatinn. Þá var Svanhildur komin í hópinn.  Lena tók svo að sér að koma hernum á litlu jólin í skólanum því ég þurfti í sjúkraþjálfun. Fyrir hádegi var ég búin að týna húslyklunum tvisvar og strákarnir búnir að finna þá fyrir ömmusauðinn.  Öllu lakara að þeir voru ekki viðlátnir um þrjúleytið, enn voru bannsettir lyklarnir horfnir.  Klukkutímaleit takk, en sitthvað fleira glatað kom í ljós og svo lyklafj.......

Guði sé lof að hausinn er svona fastur á mér, annars væri hann týndur líka. 

Athugasemdir

[Anna Gísladóttir, 21.12.2007 kl. 02:40]

Mikið svakalega er ég glöð að heyra að ég er ekki sú eina sem er svona mikill gullfiskur
Ég á einmitt nokkra svona litla hjálparkokka sem aðstoða mig oft þegar að ég er búin að tína hinum ýmsu hlutum .....