Afgangurinn af Ike.....

Er búinn að fara illa með sólarhringinn fyrir mér og mínum.  Þrátt fyrir aðstoð við að sofna, varð svefninn slitróttur sökum hávaðaroks, sem skánaði þó aðeins við að loka glugganum sem er mér þó þvert um geð.  Eitthvað angraði veðrið hjásvæfil minn þrátt fyrir gluggalokunina, alltént var hann á leiðinni á fætur vel fyrir sjö.  Ég hinsvegar þráaðist við en var samt komin á ról fyrir átta.  Árný svaf hinsvegar ærlega yfir sig, hafði ekki getað fest svefn fyrr en undir sex í morgun og vaknaði með andfælum rétt fyrir tíu.  Og varð of sein í skítverkun á Efrimýrum, þar er hún að aðstoða nýja eigendur púdduhússins við að búa húsið undir nýjan fugl sem mætir á laugardag. 

Ég ákvað í hádeginu að nú yrði því ekki frestað lengur að koma einhverju skikki á umgengnina í skúrnum mínum, þar var bara staflað inn í sumar þegar við tæmdum uppi á Mýrum.  Ég finn ekkert sem mig vantar í þessari óreiðu og til að byrja með var erfitt að smeygja sér þarna inn án þess að ryðja einhverju um koll.  Nú er ég hinsvegar komin upp í pásu... með kaffi í könnu.

Athugasemdir

[Rannveig Lena Gísladóttir, 17.9.2008 kl. 16:18]

Rokið feykti grillinu mínu af pallinum nú er það í bútum inní garðskála... en það tók ekki handónýta plaststólinn sem stóð í rúmlega tveggja metra fjarlægð frá grillinu... neibb, það drasl haggaðist varla